香港新浪網MySinaBlog 精選話題工具隨機
大少姐與少爺仔 | 08/06/09, 4:41 PM | 純粹轉載 | (4 Reads)

在某篇blog節錄出來, 覺得很值得現今做父母的參考, 所以節錄出來分享下 :


要講講子女教育,因為很多人把希望放在子女身上,把一切心血放在子女身上,子女就是他們最大的投資。這裏我想講一個小故事,今年復活節假在一個兒童遊樂會中,那裏有好多攤位遊戲,其中一個遊戲叫小孩用一隻長長玩具機械臂去挾玩具猴子,由於距離較遠,有點難度,我見到一個媽媽帶她的56歲小男孩去玩這個遊戲,母子全程用全英語對白,對答流利,但從他們的口音可以聽出來,這對母子是香港人而不是ABC

 

那個男孩挾了兩吓,挾不到猴子,媽媽已搶著說:「咁難挾,都唔好玩,走啦仔。」男孩還想一試,但媽媽已經拉著他離去。我心想媽媽全英語和兒子對答,顯然是很重視子女教育的家長,希望兒子長大後英文以至其他成績都十分了得,出人頭地。媽媽保護孩子免受傷害心切,但她一點也不重視(或者不知道要重視)對孩子性格的培養,完全沒有鼓勵兒子去嘗試,令他克服人類「畏難」的通病,這個孩子長大之後,會否成為英文好好、EQ好低的孩子呢?

 

人受自己經驗所影響,亦喜歡將自己得不到做不到的東西,在子女身上補償,自己兒時英文好就掂哂的一套,好易強加在子女身上。現在30幾至50歲的家長,在他們成長的年代,他們的爸媽會告訴他們,「記得讀好書學好英文,將來打寫樓工出人頭地啦」。在他們爸媽的年代,年青時遇上二次大戰,很多人字都唔識,唔好講英文,所以他們會叫子女學好英文。到而家4050歲人年青的時代,教育雖然開始普及,但在香港入大學比率只有1%多一點,英文好讀到名校,已是入大學踏上人生成功路的捷徑。 

但到今天世界變了,人人有書讀,20%人入到大學,加埋副學士有60%,普遍學歷水平高了,不是說英文不重要,而是說英文好只是必要條件,不是足夠條件,對後生仔的要求全面提升,要出人頭地,不只兩文三語要好,要有專業技能,而且由於參與競爭的人比過往多很多,EQ高可能更重要了。 

地球變平了,香港的孩子,將來不止和香港人競爭,也和全世界人競爭,中國有13億人口,印度有11億人口,呢兩國人口大國都很重視高等教育,單計中國一年都有500600萬大學生畢業,試想一個來自中國農村的小孩,小時候窮到無褲著,結果成條村佢讀書最叻,只有佢一個入咗大學,佢o既意志幾強,克苦能力幾高,可想而知,若這個大陸大學生和上述滿口英文但乜都無膽試的「香港少爺仔」一齊入一間公司做嘢,你估有乜後果?

 

在全世界一流的美國大公司,好多高層都係七色人種,若說他們講英文的口語,那些非美國本地人好多都有較重口音,但語言只是溝通工具,聽得明就OK,好多公司都有嘢要賣,只要你幫公司賣到嘢,美國大公司都唔係幾理高層的口音。我唔係講學英文唔重要,我覺得英文都好重要,但我們不要被舊觀念蒙蔽,以為好似以前咁,單靠英文一味就可以成功; 將來除了英文要好之外,中文好同樣重要,因為10年之後中國可能已經成為全世界最大經濟體,好多人要為中國公司打工,你識英文唔識中文一樣死; 而且光是語文好都唔夠,EQ要高,要有和全世界人才同枱競爭的準備。

 

培訓孩子EQ100種方法,各師各法,只有一種一定唔得,就係那些「直升機父母」的教仔法,那些父母有如直升機一樣,成日在子女頭頂盤旋,一見到子女有事(或者阿爸阿媽以為子女有事),就會馬上由空中降落,把子女接走,把子女救到「安全」的地方,將來如果老板容許,出一份糧,可以叫埋阿爸阿媽陪仔一齊返工,呢啲阿爸阿媽一定肯制,你話呢啲子女有無得同人爭呢? 若講剝削,呢啲阿爸阿媽又會唔會剝削咗子女學習求生能力的機會呢?

 

要認真社會經濟發展的現實,估計未來1020年的情況,才會知到矛盾的根源在那裏,好好為自己和子女預備將來吧。 


節錄自陸羽仁, 雖是講經濟, 但也會講時事.


大少姐與少爺仔 | 29/04/09, 9:46 PM | 生活碎碎念 | (2 Reads)

徵狀 : 最先是喉嚨痛, 跟住係頭痛, 然後就黎料啦, 流鼻涕..... 爭在未有發燒.   如果連發燒都有埋, 我驚我去到醫院就已經被人隔離, 兼強制留院觀察七日.

 

病情已逐漸好轉, 頭痛無左, 還有少少喉嚨痛及鼻水.  明天應該會好晒.

 

身體健康真係好重要, 一病, 就乜都無心情做了.

 

by 大小姐


大少姐與少爺仔 | 06/04/09, 3:54 PM | 生活碎碎念 | (37 Reads)

上星期五放左工, 係屋企食埋飯, 沖埋涼, 仲刷埋牙, 才施施然入院, 等待第二日做檢查。

 

順利去到病房, 送走埋少爺仔, 準備要訓覺時, 個醫生竟然出現.....  佢面帶歉意話: 忘了明天是清明節, 節日關係, 係醫院做checking, 所有收費都會貴左。(最貴係要做個$6200的超聲波)  問我點算?  (唔怪得星期五有咁多床位啦, 因為d人都出晒院嚕)

 

解決方案一 : 出左院先, 星期日再入院.... 但當其時已經辦理左入院手續啦喎..... 住院費都一樣照收的.  第二個辦法係, 乜都唔做, 等星期一再做, 要在醫院訓多兩晚..... 唔係麻...... 第三個方案係只做驗血驗尿照x-ray, 照聲波就出左院後, 由醫生轉介去私家的化驗所做, 佢話平好多喎, 只需千零蚊.... (我心諗, 唔係麻, 千零蚊雖然係比$6200平, 但$6200係可以claim保險, 但果千零蚊係要我硬梗喎, 好唔同, 你識唔識計數架?)

 

結果, 就算收費貴左, 我都打算拿拿臨做左檢查, 知道下咩事, 早d出院好過. 

 

平時照超聲波, 是收費$2800, 節日就要收費$4200+$2000(額外的醫生OT費), $6200<<< 所以係三倍價錢, 而驗血驗尿就當然又係貴一個double啦....

 

可幸我既保險係有一萬蚊既雜費可以claim, 所以都未過額既, 醫生巡房費及住院費用係計落獨立的items, 雖然出院時total 要比$11,800, 應該都可以claim足晒。

 

所有檢查的結果, 都係話正常無事.......

而驗血結果, 我的總膽固醇係比一年前驗時係降低左, 所以更加唔使擔心。

 

所有結果都正常, 咁點解我會成日右腹痛既? 好奇怪....

 

好在有買保險, 可以住私家醫院, 有效快及效好的服務, 若然係公家醫院, 就肯定會差好多好多.  so far 買左呢份醫療保, 真係覺得對保險公司唔住.

 

每年保費係$8400, 但之前有一年因為肚痛, 唔知咩事, 去左荃灣仁安check, claim左一萬蚊。   早兩年, 又係個右腹劇痛, 緊急入院check, 當時個醫生話我腎炎, 一係就要日日返診所打針, 一係就住院打針, 我梗係留院啦, 日日去「吉」一針, 好痛架麻, 反而留院打針有個好處, 唔使日日吉針, 因為佢係已經有支針長插係我個靜脈, 唔使日日「吉」, 結果出院時要成三萬蚊(乜原來d針咁貴架咩?).

 

好在又有保險claim, 扣左一萬雜費後, 剩餘的二萬蚊, 保險公司承擔8成, 我要出資2成, 所以住左七日醫院, 只係比左二千幾蚊, 保險就claim左二萬幾.  而今次, 又要再claim保險$11800.  我既保費幾乎都年年白交, 保險公司仲要嘔突. 好在有買到保險..... 一個負責任既保險agent亦都好重要, 雖然我果個agent已經轉了另一間公司做, 但我的大大小小問題, 佢都依然會盡心follow up. even是沒有收益的單, 亦不會計較.  所以如有人想搵agent, 搵佢岩架啦, 服務細心又令人安心.

 

by 大小姐 


大少姐與少爺仔 | 02/04/09, 10:00 AM | 生活碎碎念 | (32 Reads)

昨晚去左搵個醫生,寫紙比我入院照下超聲波,但醫院既床位好緊張,無位,星期四都無位,要等到星期五至有位,依家私家醫院既床位都好緊張,點解?多左人買保險,個個都可以claim保險,自然係會睇私家醫生好過睇政府啦。

 

不過最驚嚇係,個醫生問我:順便照埋腸鏡啦。

 

嘩,好驚~~~ 唔好啦掛,聽聞係會好痛架喎......我好驚....

醫生話,依家既儀器好先進架啦,以前果d就會令人唔舒服,依家果d先進好多,又有麻醉,唔痛架.....

 

我信你至奇,唔照。  

 

星期五食埋晚飯,就入院等第二日做檢查,希望無事,星期六可以出返院。

 

by 大小姐


大少姐與少爺仔 | 01/04/09, 4:21 PM | 生活碎碎念 | (28 Reads)

上個星期去左覆診,個馮醫生又係好例牌咁同我照下,就話已經唔見左粒瘤啦,但點解我仲係覺得陰陰地痛既... 佢又係好例牌咁講返上次講過既說話,好似開左錄音機照播返出黎一樣,又係話d組織未清晒,仲係會拉住d肉,咪會覺得痛lor。 就係咁,又無左千二銀,好狠貴呀。

 

今日,打算去搵個西醫,寫紙比我入院,做下body check (無計啦,要入院至有得claim保險),照下個肚入面,睇下有無乜唔妥至得,無理由成日覺得陰陰d痛。  唉,要到幾時,才可以做到醫生遠離我。

 

by 大小姐


大少姐與少爺仔 | 31/03/09, 4:15 PM | 生活碎碎念 | (32 Reads)

話說今次的金融海嘯殺傷力是前所未見的,一直以來都不太有感覺,因為巿面還是歌照唱,舞照跳,只有政府公佈出的失業數字在增加,不停有新聞說某公司要減薪,某公司要大裁員等等。 如果想現在去預訂復活節來個short trip,想也不要想了,already fully booked. 這叫海嘯?

 

巿面的物價也沒怎麼大殺價,例如在Levis一件格仔衫,竟然在賣$880(痴孖根),米價沒有怎便宜,樓價在近期有微升的趨勢。 這叫海嘯?

 

不過繼身邊認識的朋友,都已經有好幾個失業了,唉~~~希望他們都能盡快找到份工作吧(我也不好意思問他們如何,只能默默地希望能盡快聽到他們的好消息)。 看來海嘯的餘波不停地在沖擊香港經濟,而我份工雖然在巿道好景時,是underpay,但好處是在巿道差時,份工夠穩定,擁有的便要好好珍惜。

 

其實我自己計過自己,我的波動年還未到,應該在後年的辛卯年可能會差一點,而跟著的這十年大運是自己一生運程中最差的十年。 到時份工唔知仲保唔保得住呢,雖然公司說不會裁走合約員工(我這合約工一做便十年了),但難保它的政策會朝令夕改,難保它兩年後會修改政策,世事是無絕對的。

 

未來不能預測,只能做好眼前的事。

 

by 大小姐


大少姐與少爺仔 | 30/03/09, 11:03 PM | 影.視.樂.文 | (30 Reads)

近排在forum上發現1982年無線的射鵰英雄傳I, II, III, 分別係鐵血丹心, 東邪西毒及華山論劍. 於是便下載來回味.

今天看了第三集, 發現了很多有趣的情節, 如周星馳當年做大咖哩啡, 童年版的郭靖馮志峰. 而演童年拖雷的童星雖然不知是誰, 但他演得十分好. 另一方面, 回顧當年的特技, 真是十分攪笑. 至於演楊康母親包惜弱李司琪, 當年的她真是很美. 第四集黃日華已出場演郭靖了.

其實射鵰真是一套很好的故事. 故事描述郭靖楊康一生各走極端, 再加上民族的情懷, 情義兩難的局面, 令整個故事結構牢牢緊構. 如果有埋神鵰俠侶, 就可說是完整一套經典的電視劇了.

 

BY 少爺仔


的確搞笑,例如當時的演員很興打爛飯碗,懶係豪氣地喝完一碗酒,就必定會大大力掉落地(莫非古時的瓷器一文不值?)。 每每看至此情節,都會覺得好笑。

 

by 大小姐


大少姐與少爺仔 | 30/03/09, 5:17 PM | 生活碎碎念 | (24 Reads)

「Patapon 2」是我最近熱玩的PSP game,所以此處難免有少少荒廢了。  而少爺仔則沈迷在「三國誌大戰」中,更買咭,準備與街機「大戰」,一局$15,比我的娛樂更花費,都話左其實佢係大花筒....呵呵。

 

by 大小姐 

 


大少姐與少爺仔 | 20/03/09, 5:23 PM | 工作相關 | (25 Reads)

其實都屈左係心內一段時間,只是遲遲未寫出來舒發下....

 

話說調走的煩人老細衰野,隔離組的同事知道後,都很唔抵得,之前一直都很積極,亦教我要keep起老細做衰野既證據,例如個煩人老細叫公司既司機幫佢去拎中藥,如果我去幫佢落樓下拎上去,個同事就叫我要拍video做證據...... 總之就唔好比佢好過....

 

好啦,依家論到是佢自己做左個煩人老細既馬仔,變左佢既頂頭上司,態度就180度轉變了. 不單是惟命是從,之前的正義感完全無影無踪了。

 

我其實都知人會有兩面,哦,原是妳也不例外,僅此而已。 針是永遠唔「吉」到肉,就唔會知痛。 對於其有雙面態度,我也不會怪她什麼,畢竟人是只會為自己,飯碗在現時經濟下,顯得更重要。

 

by 大小姐


大少姐與少爺仔 | 15/03/09, 10:24 PM | 生活碎碎念 | (19 Reads)

其實一直都有很多事要做, 例如每天應該要看的書本(例如有關八字及財經), 每天應該看看的貨品目錄(遲下會有個考試, 幫朋友開舖), 但每天都無乜心情去做以上的事........ 久而久之, 心情也有點郁悶了, 因為感覺自己一事無成.

 

但最大問題是, 每天都提不起勁去做以上的事, 繼續又因為無做到, 而心情悶悶的, 是一個惡性循環.

 

by 大小姐


大少姐與少爺仔 | 09/03/09, 12:06 AM | 旅遊記 | (44 Reads)

其實自己舊的手提電話都用了3年左右, 功能上沒有甚麼問題, 只是外殼有一部份掉了. 於是便上網尋找有甚麼型號合自己. 但找了數遍, 始終都找不到心頭好. 直到一個月前左右, 找到了一部合心水的手機, 而且價錢合理, 功能不算繁複. 年紀大了, 都不太會追求太新的功能. 而且是同舊電話同一牌子, 方便將舊電話的資料轉輸到新的那個. 於是便決定要這款. 而大小姐都知我想換電話, 於是她當作今年的生日禮物送給我. 多謝大小姐.

講到生日禮物, 我同大小姐都算奇怪, 今年好給了一份遲來的生日禮物, 而我卻在今年年頭, 送了一份早了半年的生日禮物給她. 不過對於禮物, 只要能收到, 不論早或遲, 都是開心的. 尤其是另一半送的, 更加珍而重之.

Picture


大少姐與少爺仔 | 27/02/09, 5:15 PM | 工作相關 | (21 Reads)

岩岩收到風,原來下星期的人事調動不止是我那位煩人老闆會調,而煩人老闆的頂頭老細都有調動,即係我提起果個黑面神,公司開左個臨時性的(只有六個月)新職位比佢,DD (即係Deputy Director),正印的DD將會九月退休。  所以任誰看,都會知道這個臨時DD位是開比佢上位的,坐硬DD了。

 

以佢既年紀,四十幾歲就坐上DD,真係可以話係少年得志。

 

by 大小姐


大少姐與少爺仔 | 25/02/09, 10:12 AM | 工作相關 | (63 Reads)

早排和朋友晚飯, 其實有一位朋友是「跟官」的 (即係法庭內, 坐在法官下面果d文職的職員仔)。  見盡各類的新鮮事, 每次見面總有些法庭見聞分享.  不過今次分享的是有關人事兩則.

 

第一則, 是新上任的一位妹妹仔 ACO (Assistant Clerical Officer), 她是由CA (Clerical Assistant) promot上ACO的, 政府升一個職位, 頭三年是試用期, 試用期過了後, 才會confirmation 你升的職位.  而朋友果個部門的主管, 是一個衰人, 點解咁講? 因為個妹妹仔第一年既的 appraisal 便給了一個 「D」Grade, 即係唔合格, 若然再拎多個 D, 便會downgrade返落去, 做返CA, promotion fail.  但其實個妹妹表現很差嗎? 非也.... 而是個主管需要「食住妳」, 要你行東就行東, 行西就行西啦, 妹妹仔"act" 都唔敢"act", 咪日日都OT 到九點十點, 把部門多年積落黎的 backlog清晒.....一個人..... 連假都唔敢放.

 

到第二年啦, 個衰人才正常比個 B grade, 話你有 improvement, 繼續努力 (唔好忘記, 還有第三年的關要過)..... 妹妹仔經過了三年的折磨,  才confirm了ACO的位.  所以話呢, 政府工都唔好話好易做.

 

第二則人事是有個在中文大學剛畢業便來法庭做傳譯的妹妹仔, 所有人都覺得呢位妹妹仔很「sharp」, 能幹又本事, 不過只是兩年期的合約工。  當妹妹仔約滿將至, 仍未有消息會否續約, 內心很不安, 所以她出外去見工, 有天很開心的回公司說, 有個政府部門請了她, 是長工, 不再是合約了, 但她不知道好唔好等埋公司出通知繼約與否才決定走或不走, 因為她和一班同事都很friend, 混熟了, 覺得做生不如做熟..... 當然一班同事都叫她不需要再等了, 走吧走吧... 而隔牆有耳, 負責續約的主管知道後, 即日出了一封續約信通知妹妹仔話公司會再續多兩年約.

 

一早又唔講, 派下定心丸, 係都要人個心忐忑不安至安樂既, 到人地搵到工啦, 又急急忙忙出信話會續約啦...... 咩人黎架.... 變態人所為. 

 

 

所以就算不是商業社會, 工作如虎口, 只要有人的地方, 也有黑暗面。

 

by 大小姐


大少姐與少爺仔 | 24/02/09, 9:40 AM | 工作相關 | (25 Reads)

話說個煩人老闆調走, 其實係有內幕既.

 

首先, 每次的人事調動, 都會係三角調, 即係 A 去 B, B 去 C, C 去 A.  好少會係兩角調.

 

咁今次煩人去B位, B位既老細其實係出名唔受人歡迎 (而煩人係次之, 即係兩條友都係一擔擔出名煩出名唔得人鐘意).  但煩人有一個地方好過果個B老細既. 佢識得擦擦.....

 

又要再話說, 老細的頂頭上司係上年年中換左, 果D Assistant Director 又係因為要坐上更高一層 Deputy Director, 所以需要坐下唔同既位黎熟習整個organization運作, 而換左過黎既, 係一個黑面神(無改錯名架, 你可以整天未見過佢露過寬容, 好似你殺左佢全家咁, 一日到黑都黑口黑面).  而呢個黑面神除左黑面, 亦都做事決絕, 唔like就唔like, 任何人都唔會比面.

 

而果位B老細就唔知咩事, 不得黑面神心.  而黑面神係有兩個助手, 其中一個助手就同個B老細有唔岩既, 但就同個煩人老細好鬼老友.  就係對上果次聖誕節, 煩人既christmas lunch buffet, 果位助手都有黎, 我仲係坐係佢對面.  佢地好好傾架, 仲不時過料比煩人, 例如阿乜哥既喜惡等等....

 

所以係咁既情況下..... B老細被人調走係有原因既.  但因為人事調動, 必係要三角調, 咁搵邊兩個人同佢調呢.....  唔知個煩人落左乜藥, 竟然係佢同另一個C老闆調 (但其實兩個都未夠期需要調位, 正常係要坐五年先會調一次, 但佢地只係兩年半左右咋).

 

其實煩人同B老細既位都係好近黑面神, 所以煩人調去B老細既位, 一方面附合左公司規定(五年郁一郁, 唔可以死坐), 一方面調黎調去都係近個黑面神, 對將來佢更上一層(其實佢上一層係做CHIEF)極有幫助, 佢仲想博升架.

 

煩人係公司做左廿年, 上年先見佢拎左個廿年服務讚揚狀, 唉~~~~ 咁若然比佢博到, 升到CHIEF, 真係無天理嚕......

 

BY 大小姐


大少姐與少爺仔 | 23/02/09, 4:44 PM | 工作相關 | (42 Reads)

今日收到公司memo, 已經confirm了人事調動, 之前一直都是傳聞, 未敢肯定, 所以內心總有少少忐忑不安, 現在一天都光晒...... 哈哈~~~

 

我的煩人老闆, 將會調走嚕.....

 

隔離組的人員就多了少少愁容, 因為是他們要迎接那位煩人老闆, 我們甩難了, 而且更難得的是 : 將會調來做我新老闆, 傳聞是好好先生, 跟過他的同事都讚口不絕.

 

yeah.... 我轉運了, 哈哈哈哈~~~~

 

自從上年那個賤人老闆走後, 我的工作變得輕鬆不少, 最重要是少很多壓力, 返工又唔會再有人「目及」住, 自在很多, 呵呵呵~~~  只是有時煩人是煩了一點, 但也習慣了, 現在連煩人也走埋, 真是一天都光晒......

 

呢個位, 我唔會走啦~~~ (早排仲去左見工, 無論成功與否, 我都不會走了).

 

此番人事調事, 至少也是三年至五年會調動一次, 即係我將會有三至五年的長「假期」了, 嘻嘻~

 

by 大小姐


大少姐與少爺仔 | 15/01/09, 11:41 PM | 環保相關 | (100 Reads)

今晚時事追擊講香港人食物浪費的問題,並帶出廚餘沒人處理的事實

 

香港政府成日都話支持環保,但種種行徑顯示,只有說卻不做,部門之間又極之不協調,唉~~~~~

 

原來香港人於07年浪費的廚餘,足足有120噸,可足以夠飢餓國家的千三萬人口一年的糧食.  出街食飯,食唔晒請帶走,就咁掉左去,真係見者心痛,聞者心酸.  就前排去飲宴,單單我果台的食物,就浪費了1/3,是1/3呀,而且是接近一半. 因為12人的餐,只有8個人坐,不要說坐滿12人也未必食得晒,現在是8人食12人的份量,我初初都很努力食食食...... 但實在太飽了...... 未到上魚,已經幾乎食唔落,後面果d直頭無乜掂過. 全部拎去掉落堆田區呀..... 望住圍台, 好鬼心痛. 因為果d份量足夠我食一個星期呀,如果比我打包就好了.....

 

by 大小姐


大少姐與少爺仔 | 14/01/09, 3:45 PM | 理財相關 | (85 Reads)

我的故事﹕我永遠對金錢飢渴 (明報) 09月 09日 星期日 05:05AM

「一世好彩!」蘇民峰第一次見到我,就以此四字贈予本人。我完全同意他的說法,雖然自小家貧,但我一生人的確幾「好彩」。

千金難買少年窮

我好彩,因為我有一個好母親。

我老曹十三歲那年,父親過世,家境自然貧困。母親做工廠女工撐起頭家,令我們三兄弟可以繼續讀書,一份人工扣除房租、學費等必須開支,每月伙食費只剩下65元。我負責買餸,讀中一到中五這五年,每天就是用2元變出「三餸一湯」──用鴨血、大豆芽菜和豆腐滾湯,然後再分別烹調這三樣食物。連續五年,差不多每餐都是同樣的「三餸一湯」。

貧窮,令我的童年不時處於惶恐之中,例如擔心沒錢交租,要看「包租婆」的晚娘面孔,或沒錢交學費不敢返學。更有一次,有鄰居不見了「一粒金」,立即就懷疑是我老曹偷,要搜我身,我自然反抗,但母親卻同意讓人搜我身,結果自然一無所獲。最後鄰居在自己房間某處尋回那粒金,不但沒有向我道歉,反而說「你咁窮,偷金係遲早既事」這句話刺得我好痛,母親就勸我「做人要爭氣,唔好同人鬥氣」。

童年時朝不保夕的感覺,加上給人看扁的經歷,我老曹決定要「爭氣」,努力工作和投資賺錢。

記得中學畢業時,同學們一起談人生目標,我老曹的回答十分直截了當──要以一切合法手段去賺錢!我老曹1968年識女朋友(今天的曹太)時,亦對她說自己的夢想是「富有」,令她可以過舒適的生活。

我永遠對金錢飢渴(hungry)和貪心(greedy)——即使到今天,我的財富已足夠家人幾代都生活無憂,但仍不能改變這種心態。

中國人對「貪」字一向有負面演繹,主張「安貧樂道」,但西方資本主義精神卻十分強調「貪心」,明白這是推動經濟發展的原動力,不過當然要「貪」得其所。

「少年窮」的感覺令我一生都對金錢飢渴,反之我太太是全世界最不貪心的人,1980年當我老曹賺到第一個100萬元時,她已叫我退休。如果不是我老曹貪念作怪,二十五年前已「安貧樂道」,現在可能已是維園    阿伯。

有智慧不如趁勢

1967年,我老曹中學畢業,考試成績不錯,但家境貧窮無法負擔預科的學費,於是決定出來工作。

母親主張我學一技傍身,因而投身當年最大的工業──紡織業,學維修紡織機。做了六個月,因受不了工廠內的酷熱、噪音及輪班制,結果在1968年轉行做假髮,認識了今天的太太。過去四十年,香港紡織業由盛極而衰,甚至從香港消失。若然我1968年沒有離開紡織業,自己的一生又會如何?

認識女朋友後,因為沒錢拍拖,加上認為假髮業不是長遠安身立命之所,1969年我便轉行做股票,成為人生另一「好彩」轉捩點。我老曹可說是誤打誤撞加入證券行工作,理由是當年一位同學的伯父買了個股票經紀牌,要一個識英文的人幫他處理文件。

當年自己連股票是什麼都不曉,卻去了證券行做,然後看覑恒生指數由1969年入行時70點升至2007年23,000點以上,升幅超過三百倍,真是「盲鮋都賺到錢」。所以我經常說「有智慧不如趁勢」,做事「三分努力、七分天意」,如果你連三分努力都不肯付出,便不要怨天;反之,如果你付出七分努力仍沒有成就,此乃天意,因為謀事在人,成事在天,許多時人生是充滿無奈的。

工字不出頭

開始打工時,前輩已跟我老曹說「工字不出頭」,於是我1969年開始學人投資。事實證明這個說法完全沒錯,到了今日,我老曹的財富85%來自投資回報,只有15%來自三十八年薪金減去每年開支儲下來的資金。

當年為了籌集資金投資,加上要花錢拍拖,我不但投稿到報館賺稿費,又在每天三時半收市後,到股票行隔壁的洋行打英文信,再到旺角    教書,晚上替人補習英文。因為投稿到《明報晚報》獲得刊登,認識了當時任職編輯的林山木兄,不但令我半生與報業結下不解緣,同時有機會投資《信報》又賺一筆。


三十歲前發達 家門不幸

避過1973年股災,我老曹自以為是投資天才,在股市中可以跑贏所有其他投資者。到1974年7月,恒生指數已由1,774點跌至478點跌了73%,應該入市吧!當時我選中買和記,由每股8元開始一直買到每股1 元。結果1974年12月恒指跌至150點時,自己的50萬元投資只剩下10萬元價值。今天回想,那是自己另一個「好彩」。我現在很感謝和記洋行,讓我在三十歲前上了關於投資的寶貴一課。不但知道股市「專收精仔」,自己的投資知識絕不足夠,更從此學曉一句「止蝕不止賺」,一生受用。那次總結到的經驗是:三十歲前發達,家門不幸!一生總要「衰」一次,愈年輕愈好,因為年輕時輸掉大部分身家,日後仍有很多時間讓自己將它賺回來。

屋漏更兼連夜雨,1974年投資「損手」,同時我又遭任職的投資公司遣散,困窘之下,差點想自殺。1975年我發誓,自己有生之年,不容許同類事件(因股災而投資大幅虧損)再次出現,「止蝕不止賺」,至今逾三十年,總算平平安安。每次股災來臨時,我老曹都因行使止蝕策略而巧妙地避過。

我的趁勢創富路,再次證明「三分努力,七分天意」,如沒有九七問題,相信本人不會投資倫敦    物業,更不會買十間這樣多。到2005及06年我分階段賣出上述物業,至今已賣出八間,仍有兩間在沽售中。平均獲利100%,當年只付樓價20%;換言之,十年回報超過五倍。

文:投資專家 曹仁超


大少姐與少爺仔 | 13/01/09, 3:16 PM | 生活碎碎念 | (73 Reads)

由於用facebook upload photos太方便了, 所以都開始漸漸地習慣了在facebook 出 post (文字post可以用筆記, youtube的可以全forward, photos更是批次的upload).

 

漸漸的, blog 變得疏於打理了。  以後都以文字為主, 現在要逐張相片upload嫌太麻煩了。

 

by 大小姐 


大少姐與少爺仔 | 07/01/09, 6:52 PM | 純粹轉載 | (44 Reads)

Plan Your Work

Work Your Plan

Then Your Plan will Work


大少姐與少爺仔 | 06/01/09, 5:45 PM | 純粹轉載 | (56 Reads)
以下是一則真實的好心有好報例子。

惻隱之心能結善果

有一個窮苦的蘇格蘭農夫,住在荒郊的茅舍裏,他叫弗萊明。

一天,他在田間耕作,忽聽見來自附近沼澤地的呼救聲,他迅速跑了過去。

看到一個嚇壞了的男孩,泥沼已淹沒到他的胸部,他在拼命地掙扎並大聲呼救。

弗萊明救起了這個本可能會緩慢而恐怖地死去的少年。

第二天,一架華麗的馬車來到了弗萊明家。

從車上走下一位風度翩翩的紳士,自稱是昨天被救的那個孩子的父親。

「你救了我兒子的命」他說:「我想報答你的恩情。」

「不,不,我不需要你的任何回報。」農夫說。

此時,農夫的兒子從屋裏走了出來……

「這是你的兒子嗎?」紳士問。

「是的。」農夫自豪地說。

「那好,我將提供給他和我兒子同樣好的教育。

如果他有他父親同樣的美德,那麼他就會成為一個你我都會為之驕傲的人。」

弗萊明的兒子被送進了極好的學校,隨後畢業於倫敦聖瑪麗醫院醫科大學。

他就是因發明盤尼西林(青霉素)而聞名世界的亞歷山大.弗萊明。

幾年後,那位紳士的兒子得了很嚴重的肺炎。

這次又會是誰來救他的命呢?——盤尼西林。

他的名字叫甚麼?——溫斯頓.邱吉爾(英國首相)!

現在你該相信甚麼叫做因果輪迴了吧!

好好工作——就像不光為了賺錢那樣。

好好去愛——彷彿你不曾受到過任何傷害。

盡情跳舞——即使無人喝采。

歡樂歌唱——那怕無人聆聽。

好好活着——就當這是人間天堂。


Next